This article has been translated from English to Tagalog.
Ano ang purpose ng paggamit ng Bitcoin wallet?
Bakit nga ba kailangan ng crypto wallet?
Para maintindihan kung bakit kailangan ang Bitcoin wallets, kailangan nating tingnan ang tradisyonal na paraan ng paglipat ng pera sa pagitan ng dalawang tao gamit ang….bank accounts.
Para ma-track ang pera ng kanilang mga kliyente, gumagawa ang banko ng isang ledger na nagre-record ng mga balanse batay sa mga account numbers.
Hetong simplified version:
| Account | Balance |
| 001 | $10 |
| 002 | $20 |
| 003 | $50 |
Ang ledger na ito ay pinapanatili ng isang administrator. Ang administrator na ito ang nag-aassign ng account numbers sa mga kliyente, at ang mga kliyente ay nagbabayad sa pamamagitan ng pagpapadala ng request sa administrator.
Para magampanan ng administrator ang request na ito, kailangan ng isang authentication process kung saan pinapatunayan ng kliyente na siya ang tunay na may-ari ng account.
Kaya ang banko ay malamang na gumagawa ng username at password combination na nakakabit sa bawat account.
Kung alam mo ang username at password na naka-assign sa account, ito ay nagpapatunay na ikaw ang may-ari ng account na iyon.
| Account | Username | Password | Balance |
| 001 | Joe | 9876 | $10 |
| 002 | Angie | 1234 | $20 |
| 003 | Bill | 5511 | $50 |
Ang administrator ang nagbibigay (o nagde-deny) ng access sa mga account at siya rin ay nagme-maintain ng tamang balanse ng bawat account.
Tinitiyak ng administrator na walang gagastusin ang pera na wala sila sa account o gagastusin ang parehong pera ng higit sa isang beses (“double spend”).
Para sa isang decentralized digital currency tulad ng Bitcoin, problema ito.
Ang pag-rely sa isang administrator ay nagdudulot ng problema ng centralization. Hindi mo kontrolado ang iyong account! Ang administrator ang may control.
Puwedeng i-deny ng isang administrator ang access sa iyong account, puwede rin silang mag-block o mag-censor ng transactions, o kahit hindi ka payagang magbukas ng account.
Halimbawa, may kapangyarihan ang mga banko na isara ang iyong account(s) sa kanila. Kaya rin nilang baliktarin ang mga transaksyon at i-freeze ang mga account.
Isipin mo na lang, nagdi-dinner kayo ng hot date mo, tapos nung oras ng bayaran, nalaman mong na-deny ang transaction mo kasi randomly nag-decide ang bank mo na hindi makipag-business sa restaurant na iyon.
Nakakahiya 'yun. Baka isipin ng hot date mo na wala kang pera. 🤦
Kada may entity na pwedeng mag-approve o mag-deny ng isang bagay, kontrolado ka ng isang centralized third party.
Para gumana ang isang decentralized digital currency, dapat kahit sino ay puwedeng magbukas ng “account” at puwedeng makipagtransaksyon sa kahit sino na gusto nila. Hindi mo dapat kailangang humingi ng pahintulot.
Ano ang solusyon? Alisin ang administrator.
Pero, meron bang paraan na makagawa ka ng “account” nang walang administrator?
Aba, meron! 👍
May solusyon ang Bitcoin: Sa halip na mga account numbers, gumamit ng “addresses”.
| Bitcoin Address | BTC |
| 1DmjiSdcaSUPyqEuhqHkLrudpJUYDXct5s | 2 |
| 3QqQAx4ToxsiiFtXbrDkuCSBGYKd56vTzU | 15 |
| 1PhGCKEeLjCo6ZGz9NAKL3FvCZACLbV1DC | 3 |
Paano ka magkakaroon ng address? Kailangan mo lang ng wallet…at marami kang puwedeng i-download na libre sa internet.
Sa paggamit ng addresses sa halip na account numbers, kahit sino ay puwedeng mag-create ng kanilang sariling “accounts” gamit ang wallet software sa kanilang sariling computer nang hindi kinakailangang humingi ng account number mula sa administrator.
Puwede kang gumawa ng maraming addresses hangga’t gusto mo at ang wallet software mo ang mag-aasikaso sa lahat ng ito para sa iyo.
Kaya hindi tulad ng bank accounts, ang address ay pwedeng gawin ng kahit sino sa loob ng ilang segundo nang hindi kailangan ng third-party administrator.Ang paggamit ng addresses, na ginagawa ng wallet para sa iyo nang libre, ay nagpapahintulot sa Bitcoin na maging permissionless.
Ibig sabihin, ang mga gumagamit ng Bitcoin ay hindi kinakailangang humingi ng pahintulot mula kahit kanino para makasali sa Bitcoin network.
Binibigyan ng wallets ang mga ordinaryong tao ng kakayahang magsagawa ng permissionless transactions nang walang mga third parties at nang hindi na kailangang magparehistro!
Nagiging mas accessible rin ang Bitcoin (at ibang crypto) sa mas maraming tao gamit ang wallets. Basta may internet connection ka, puwede kang mag-download ng wallet app, i-install ito, gumawa ng Bitcoin address, at game na!
Wala tayong kailangan na permiso para gumamit ng bitcoin o anumang cryptocurrency!
Pinapabuti ng Crypto ang financial inclusion, nagbibigay ng mas madaling access sa mga kapaki-pakinabang at abot-kayang financial products at services gaya ng payments sa higit 1.7 bilyon na tao na nananatiling under- o unbanked.
Kung binabasa mo ito, pwede ka nang magsimula gumamit ng bitcoin ngayon. Kahit sino sa mundo ay puwedeng makilahok basta may device na makaka-access sa internet.
Hindi mo kailangan mag-apply para magbukas ng account sa banko o anumang korporasyon para magpadala at tumanggap ng bitcoins. Ito ang purpose ng wallets at kung bakit sila sobrang importante.