Paano Mag-Trade ng Triangle Chart Patterns

Ang triangle chart pattern ay parang nagluluto ka ng adobo na unti-unting lumalapot habang tumatagal, at ito ay nagpapakita ng labanan sa pagitan ng bulls at bears.

Ang triangle pattern ay karaniwang tinuturing na “continuation pattern”, ibig sabihin pagkatapos mabuo ang pattern, inaasahan na ang presyo ay magpapatuloy sa direksyon ng trend na sinusundan nito bago lumitaw ang pattern.

Ang triangle pattern ay karaniwang nabubuo kapag mayroon itong hindi bababa sa limang beses na paghawak ng support at resistance.

Halimbawa, tatlong hawak sa support line at dalawa sa resistance line. O kaya baliktad.

Katulad ng tatlong biik, may tatlong uri rin ng triangle chart formations: symmetrical triangle, ascending triangle, at descending triangle.

Symmetrical Triangle

Ang symmetrical triangle ay isang chart formation kung saan ang slope ng high ng presyo at ang slope ng low ng presyo ay nagtatagpo sa isang punto na kamukha ng triangle.

Ang nangyayari sa formation na ito ay gumagawa ang market ng lower highs at higher lows.

Ibig sabihin nito, hindi naitutulak ng mga buyers o sellers ang presyo para makagawa ng isang malinaw na trend.

Kung ito ay isang labanan sa pagitan ng mga buyers at sellers, magiging tabla ito.

Ito rin ay isang uri ng consolidation.

Sa chart sa itaas, makikita natin na walang isa man sa mga buyers o sellers ang kayang itulak ang presyo sa kanilang direksyon. Kapag nangyari ito, nagkakaroon tayo ng lower highs at higher lows.

Habang mas lumalapit ang dalawang slope na ito, ibig sabihin ay malapit nang mangyari ang breakout.

Hindi natin alam kung saang direksyon ang breakout, pero alam natin na ang market ay malamang mag-breakout. Sa huli, bibigay ang isa sa mga panig ng market.

Paano natin ito mapapakinabangan?

Simple lang.

Maaari tayong maglagay ng entry orders sa itaas ng slope ng lower highs at sa ibaba ng slope ng higher lows ng symmetrical triangle.

Sapagkat alam na natin na ang presyo ay mag-breakout, pwede na tayong makisakay sa kahit anong direksyon na kunin ng market.

Sa halimbawang ito, kung naglagay tayo ng entry order sa itaas ng slope ng lower highs, masasama tayo sa magandang pag-akyat.

Kung naglagay ka ng isa pang entry order sa ibaba ng slope ng higher lows, kakanselahin mo ito kapag natamaan na ang unang order.

Ascending Triangle

Ang ascending triangle ay isang uri ng triangle chart pattern na nangyayari kapag mayroong resistance level at isang slope ng higher lows.

Ang nangyayari sa oras na ito ay may isang antas na hindi kayang lampasan ng mga buyers. Gayunpaman, unti-unti silang nagsisimulang itulak ang presyo pataas na makikita sa higher lows.

Sa chart sa itaas, makikita mo na ang mga buyers ay nagsisimulang lumakas dahil gumagawa sila ng higher lows.

Patuloy nilang pinipilit ang resistance level na iyon at bilang resulta, isang breakout ang tiyak na mangyayari.

Ngayon ang tanong ay, “Saang direksyon ito tutungo? Kakayanin ba ng mga buyers na lampasan ang level na iyon o masyado bang malakas ang resistance?”

Maraming libro sa charting ang magsasabi sa iyo na sa karamihan ng mga kaso, ang mga buyers ang mananalo sa labanan na ito at ang presyo ay magba-breakout lagpas sa resistance.

Gayunpaman, naranasan namin na hindi ito palaging nangyayari.

Kung minsan ang resistance level ay masyadong malakas, at walang sapat na buying power para itulak ito pataas.

Kadalasan, ang presyo ay tataas nga. Ang punto na sinusubukan naming iparating ay hindi mo dapat ikonsensya kung saang direksyon ang presyo pupunta, pero dapat handa ka sa pagkilos sa ALINMANG direksyon.

Sa kasong ito, magse-set kami ng entry order sa itaas ng resistance line at sa ibaba ng slope ng higher lows.

Sa senaryong ito, natalo ang mga buyers sa labanan at ang presyo ay bumagsak! Makikita mo na ang pagbagsak ay halos parehong distansya sa taas ng triangle formation.

Kung nagset tayo ng short order sa ibaba ng triangle, maaabutan natin ang ilang pips mula sa pagbagsak na iyon.

Descending Triangle

Katulad ng inaasahan mo, ang descending triangles ay kabaligtaran ng ascending triangles (alam naming matalino ka!).

Sa descending triangle chart patterns, mayroong sunud-sunod na lower highs na bumubuo sa upper line. Ang lower line ay isang support level na hindi kayang basagin ng presyo.

Sa chart sa itaas, makikita mo na ang presyo ay unti-unting gumagawa ng lower highs na nagsasabi sa atin na ang mga sellers ay nagsisimula nang makakuha ng kaunting ground laban sa mga buyers.

Ngayon kadalasan, at sinasabi namin na KADALASAN, ang presyo ay sa wakas ay magbe-break sa support line at magpapatuloy na bumagsak.

Gayunpaman, sa ilang mga kaso, ang support line ay masyadong malakas, at ang presyo ay babalik dito at gagawa ng malakas na pag-akyat.

Ang magandang balita ay hindi natin iniintindi kung saan pupunta ang presyo. Alam lang natin na malapit na itong gumalaw saan man.

Sa kasong ito, maglalagay kami ng entry orders sa itaas ng upper line (ang lower highs) at sa ibaba ng support line.

Sa kasong ito, ang presyo ay nag-break pataas sa itaas ng triangle pattern.

Pagkatapos ng upside breakout, ito ay nagpatuloy sa pag-akyat, mga halos parehong taas ng vertical na distansya ng triangle.

Ang paglalagay ng entry order sa itaas ng tuktok ng triangle at pag-target na kasing taas ng taas ng formation ay magreresulta sa magagandang kita.